من اوردا بير گؤزل توي ائيلميشديم
سخاوت عزتي ( عندليب)
هله ياديمدادير او شيرين آنلار
من اوردا بير گؤزل توي ائيلميشديم
آي مني دويانلار، مني آنانلار
من اوردا بير گؤزل توي ائيلميشديم
بير حَيَط واريدي باغچالي،باغلي
باغيندا گيلاسلار، قارالي آغلي
بير اوتاق واريدي طاغچالي،طاغلي
من اوردا بير گؤزل توي ائيلميشديم
پوزولوب رونقي، دييشيب حالي
قاريشيب توپراغا جاهي، جلالي
او دؤشده بير كندوار ياسلي، يارالي
من اوردا بير گؤزل توي ائيلميشديم
دونيانين خئيريني شرريني آتيب
ايللر يورغونوايدي ييخيليب ياتيب
اوردا بير تايار كند يئريندن باتيب
من اوردا بير گؤزل توي ائيلميشديم
اوردا آنالار وار ساچيني يولار
باجي وار نيسگيلي ابدي قالار
هاردادي خوراموو هاني مولالار
من اوردا بير گؤزل توي ائيلميشديم
« عندليب» سؤزومون ازلي مزرعه
هر سؤزو صؤحبتي مزه لي مزرعه
هاني گؤزللرين گؤزلي مزرعه
من اوردا بير گؤزل توي ائيلميشديم
|